आगामी चैत ५ गते निर्धारण गरिएको स्वबियु चुनावमा प्रतिस्पर्धा गर्न पालुङ बहुमुखी क्याम्पसमा ५ वटा विद्यार्थी संगठनले आफ्नो संगठन दर्ता गराएका छन् ।
निर्वाचन समितिका अनुसार विद्यार्थी संगठन दर्ताको समय १९ फागुन अपरान्ह ३ बजेसम्म तोकिएकोमा उक्त अवधिभित्र ५ वटा विद्यार्थी संगठनले आफ्नो संगठन दर्ता गराएका हुन् ।
निर्वाचन प्रयाेजनका लागि दर्ता गराउने संगठनहरुमा क्रमशः नेकपा माओवादी केन्द्र निकट अखिल नेपाल विद्यार्थी यूनियन(क्रान्तिकारी), नेपाली काँग्रेस निकट नेपाल विद्यार्थी संघ, नेकपा एमाले निकट अखिल नेपाल स्वतन्त्र विद्यार्थी युनियन रहेका छन् । त्यसैगरी क्रमसंख्या ४ मा राप्रपा निकट राष्ट्रिय प्रजातान्त्रिक विद्यार्थी संगठन र क्रमसंख्या ५ मा नेकपा एकीकृत समाजवादी निकट अखिल नेपाल राष्ट्रिय स्वतन्त्र यूनियन दर्ता भएकाे पालुङ बहुमुखी क्याम्पस निर्वाचन समितिले विज्ञप्तीमार्फत् जानकारी दिएकाे छ ।
यसपटक देशभरिका त्रिविका ६२ आङ्गिक र एक हजार ४० सम्बन्धन प्राप्त क्याम्पसमा स्ववियु चुनाव हुँदैछ ।
चुनावी कार्यतालिकाअनुसार फागुन २१ गते मतदाता सूची प्रकाशन, फागुन २५ गते मतदाता सूचीमा दाबी-विरोध तोकिएको छ । यस्तै फागुन २६ गते उम्मेदवारको मनोनयनपत्र वितरण, फागुन २७ गते बिहान ११ बजेदेखि दिउँसो २ बजेसम्म समानुपातिक तथा प्रत्यक्षतर्फको उम्मेदवारी दर्ता तोकिएको छ ।
पालुङ बहुमुुखी क्याम्पसमा स्ववियुको अध्यक्ष, सचिव र कोषाध्यक्ष तथा ३ जना सदस्य प्रत्यक्ष निर्वाचन प्रणाली र उपाध्यक्ष र सहसचिव तथा ३ जना सदस्य समानुपातिक निर्वाचन प्रणालीबाट चयन हुनेछन् ।
पालिका प्रेस
थप जानकारी
प्रतिक्रिया दिनुहोस्