यस्तो छ, बागमती प्रदेश सरकारको निर्णय !

बागमती प्रदेश मुख्यमन्त्री तथा मन्त्रिपरिषद्को बैठकले विभिन्न निर्णयहरु गरेको छ । प्रदेशका मुख्यमन्त्री शालिकराम जम्मकट्टेलको अध्यक्षतामा सोमबार साँझ बसेको बैठकले विभिन्न निर्णयहरु गरेको बागमती सकारका प्रवक्ता एवम् आन्तरिक मामिला तथा कानूनमन्त्री गंगानारायण श्रेष्ठले जानकारी दिए ।

बैठकले काठमाडौं बुढानिलकण्ठ नगरपालिका– ५ निवासी कृष्ण कुमारी बस्नेतलाई प्रदेश नीति तथा योजना आयोगको सदस्यमा मनोनित गरेको छ । त्यस्तै, बैठकले चेपाङ समूदायले मनाउँदै आएको न्वागी पर्वको अवसरमा यही भदौ २२ गते प्रदेशको मकवानपुर, धादिङ र चितवन गरी तीन जिल्लामा सार्वजनिक विदा दिने निर्णय गरेको प्रवक्ता श्रेष्ठले बताए ।

यसैगरी, बैठकले प्रदेश विपद् व्यवस्थापन कोष परिचालन कार्यविधि समेत २०८० स्वीकृत गरको छ भने मुख्यमन्त्री तथा मन्त्रिपरिषद् कार्यालयले सिफारिस गरेको संगठन संरचना र दरबन्दी तेरिज सहितको संक्षिप्त संगठन तथा व्यवस्थापन सर्वेक्षण स्वीकृत गर्ने निर्णय भएको प्रवक्ता श्रेष्ठले जानकारी दिए ।

साथै बैठकले भौतिक पूर्वाधार विकास मन्त्रालयले सिफारिस गरेको स्रोत सुनिश्चितता गर्ने तथा आयोजना सम्झौताका लागि अख्न्तियारी प्रदान गर्ने निर्णय समेत गरेको उनले बताए ।