भक्तपुरका नेवार समुदायले यसवर्षको तिहारमा कात्तिक ४ गते म्ह: पूजा र ५ गते किजा पूजा (भाइटिका) मनाउने भएको छ । आज भक्तपुर नगरपालिकाका प्रमुख सुनिल प्रजापतिको अध्यक्षतामा यसवर्षको तिहार (स्वन्ती) मनाउने विषयमा तलेजुका पुजारीहरू तथा ज्योतिषहरू डा. वीरेन्द्रप्रसाद कायष्त र केदारप्रसाद दैवज्ञ जोशीसहितको उपस्थितिमा छलफल गरी यस्तो निर्णय गरेको हो ।

तलेजुका पुजारीहरूको सुझाव र तिथिअनुसार २०८२ कात्तिक २ गते आइतबार काग तिहार, ३ गते सोमबार बिहान कुकुर तिहार, दिउँसो ३ बजेपछि औँसी तिथि लाग्ने हुँदा साँझ लक्ष्मी पूजा गर्ने, कात्तिक ४ गते मंगलबार दिउँसो ४:२९ बजेपछि कछला थ्व प्रतिपदा तिथि पर्ने भएकाले म्हा पूजा गर्ने र ५ गते साँझ ६:२० बजेपछि द्वितीया तिथि पर्ने भएकाले किजा पूजा अर्थात् भाइटिका गर्ने निर्णय गरेको हो ।

पञ्चांग निर्णायक समितिले भने कात्तिक ४ गते खाली, ५ गते म्ह: पूजा र ६ गते बिहीबार किजा पूजा अर्थात् भाइटिका गर्ने गरी साइत सार्वजनिक गरेको छ । भक्तपुर नगरपालिकाले केही वर्षयता पञ्चांग निर्णयक समितिले सार्वजनिक गरेको तिथिमितिअनुसार तिहार नमानेर भक्तपुरको तलेजुका पुजारी र ज्योतिषहरूले गरेको निर्णयानुसार तिहारको पर्वहरू मनाउने निर्णय गरी सोहीअनुसार गर्न आह्वान गर्दै आएको छ ।

सोही अनुरूप यसवर्ष पनि बसेको बैठकबाट भक्तपुर नगरपालिकाले पञ्चायत निर्णायक समितिको निर्णयभन्दा फरक तिथि मिति सार्वजनिक गर्दै सोहीअनुसार तिहार मनाउन आह्वान गरेको छ । यस्तो निर्णयमा भक्तपुरका नेवार समुदायले केहीले नगरपालिकाको निर्णयानुसार तिहार मनाउने र केहीले पञ्चायत निर्णायक समितिको निर्णयानुसार तिहार मनाउँदै आएका छन् ।

पालिका प्रेस
थप जानकारी