कार्यालयको कामकाज ठप्प: पालिकाका प्रशाकीय अधिकृत एक महिने निजी भ्रमणमा !

जीतपुर सिमरा उपमहानगरपालिकाका प्रमुख प्रशासकीय अधिकृत चेतकुमार पोखरेल कार्यालयको कामकाज ठप्प हुने गरी करिव डेढ महिना निजी भ्रमणमा गएर फर्किएका छन् । प्रमुख प्रशासकीय अधिकृत पोखरेल सामाजिक शाखाका कर्मचारीसहित जम्बो टोली लिएर भारतको गोवा, बाबाधाम, वैष्णोदेवी, ओमशान्ति लगायत तीर्थाटन गएका हुन् ।

उपमहानगरका उपप्रमुख भोला अधिकारीले कार्यालयको कामकाज ठप्प हुने गरी कार्यालयका अधिकृत बोकेर प्रशासकीय प्रमुख निजी भ्रमणमा गएको भन्दै आपत्ति जनाएका छन् । प्रशासकीय प्रमुख नहुँदा यतिन्जेल कार्यालयको काम ठप्प भएको उनले बताए । नगर प्रमुख राजन पौडेलले प्रमुख प्रशासकीय अधिकृत पोखरेलले २२ दिनको मात्रै बिदा स्वीकृत गराएको जनाए । नगरसभाबाट पारित भएका योजना कार्यान्वयन गर्ने, कर्मचारी प्रशासनलाई चुस्त दुरुस्त कामका खटाउने प्रमुख जिम्मेवार व्यक्ति नै गैर जिम्मेवार ढङ्गले अधिकृत बोकेर आफूखुसी हिँडेको उपप्रमुख अधिकारीको आरोप छ ।

पोखरेलले सामाजिक शाखाका प्रमुख हरिकिशोर साह कानुसहित अन्य कर्मचारीलाई लिएर पहिलो चरणमा २२ दिनका लागि भारतको गोवा र वैष्णोदेवी गएका थिए भने दोस्रो चरणमा बाबाधाम पुगेको उपमहानगर स्रोतले जनाएको छ । भ्रमण टोलीमा सहभागी सामाजिक शाखाकी कर्मचारी दुर्गा न्यौपानेले पहिलो चरणको भ्रमणमा प्रमुख प्रशासकीय प्रमुखसँग गएको तर दोस्रो चरणमा को-को गएको भन्ने विषयमा आफूलाई जानकारी नभएको बताइन् ।

उपमहानगरले हरिकिशोर साहलाई डेढ महिना अघि नै सामाजिक शाखाबाट वडा नं २३ को वडा कार्यालयमा सरुवा गरेको थियो तर उपमहानगरको निर्णय अटेर गरेर साह सामाजिक शाखामै बसेका छन् । उपमहानगरको निर्णय अटेर गर्ने कर्मचारीलाई प्रमुख प्रशासकीय अधिकृतले नै संरक्षण गर्दै तीर्थाटनमा लगेको भन्दै अन्य कर्मचारी चकित भएका छन् ।