जन्मदर्तामा थर परिवर्तनः "ऐन भन्दा पावरफुल परिपत्र ?"

राष्ट्रिय परिचयपत्र तथा पञ्चीकरण विभागले दलित थर परिवर्तन गरी दलित जातिभित्रको थर कायम गर्न निवेदन परेमा सोहीअनुसार गर्न स्थानीय तहलाई निर्देशन दिएको छ ।

गृह मन्त्रालय मातहतको पञ्चीकरण विभागले देशभरका ६ हजार ७४३ वडा कार्यालयलाई पत्राचार गर्दै राष्ट्रिय दलित आयोगद्वारा प्रकाशित दलित जातीय अनुसूची विवरणमा उल्लेख भएकामा सम्बन्धित दलित जातिभित्रको थरहरु मध्येबाट निवेदकले चाहेको थर राखी जन्म दर्तामा थर परिवर्तन गरी प्रतिलिपि जारी गर्न निर्देशन दिएको हो ।

गृह मन्त्रालयलाई जानकारी दिँदै देशभरका सबै जिल्ला प्रशासन कार्यालय, इलाका प्रशासन कार्यालय, सीमा प्रशासन कार्यालयलाई बोधार्थ/कार्यार्थमा राख्दै विभागले दिइएको तीन बुँदे निर्देशन दिएको हो ।

यद्यपि राष्ट्रिय परिचयपत्र तथा पञ्जिकरण ऐन, २०७६ को दफा २५ मा दर्ता भएको एकवर्षभित्र मात्र संशोधन गर्न सकिने व्यवस्था छ । ऐन र परिपत्र बाझिएपछि स्थानीय पञ्जिकाधिकारीहरु अलमलमा परेका छन् ।