विपन्न एकल महिलालाई बाख्रा वितरण

थाहा नगरपालिका महिला बालबालिका, जेष्ठ नागरिक तथा अपांग परिचयपत्र वितरण शाखाको आयोजनामा नगरस्तरीय बिपन्न एकल महिलाहरुलाई चार दिने व्यावसायिक बाख्रा पालन तालिम दिइएको छ । विकास घर शिखरकोटमा ६ देखि ९ असारसम्म भएको तालिममको एक समारोहकाबीच समापन गरिएको हो ।

थाहानगरका सामाजिक विकास समिती सदस्य जनक बिकको अध्यक्षता तथा वडा नम्बर ४ का अध्यक्ष नारायण लामाको प्रमुख आतिथ्यतामा सम्पन्न समापन समारोहमा सहभागी महिलाहरुलाई बीउ बाख्रा समेत वितरण गरिएको थियो । एकल महिलाको जीविकोपार्जन र आयआर्जनमा टेवा पुगोस भन्ने उद्देश्यले थाहानगरका २४ जना एकल महिलालाई एकएक ओटा बाख्रा बितरण गरिएको छ ।

बाख्रा वितरणबाट विपन्न महिलाका लागि आयआर्जनको बाटो खुलेको ४ नम्बर वडा अध्यक्ष नारायण लामाले बताए । थाहा नगरपालिका महिला तथा बालबालिका शाखा प्रमुख प्रतिमा मोक्तानले अति बिपन्न एकल महिलाको आयआर्जनमा सघाउ पुगोस र उनीहरु क्रमिक रुपमा जिविकोपार्जनका लागि बाख्रा पालनमा संलग्न होउन् भनेर बाख्रा बितरण गरेको बताइन् ।

कार्यक्रममा पशु शाखा प्रमुख राघवेन्द्र मिश्र, रुप्से किटेनी टोल विकास संस्थाका अध्यक्ष गणेश लामा, देउखेल सहरी स्वास्थ्य केन्द्रका नेमराज थिङ, पशु प्राविधिक रुपेश कुमार मिश्र लगायतका उपस्थिती रहेको थियो।