लम्पी स्किनले मरेका पशुका किसानलाई नगरपालिकाले १० हजार दिने

बनेपा नगरपालिकाका प्रमुख शान्ति रत्न शाक्यको अध्यक्षतामा बसेको बैठकले लम्पी स्किन रोगबाट मरेका पशुका किसानलाई राहत रकम १० हजार रुपैयाँ दिने निर्णय गरेको हो ।

नगरपालिकामा लम्पी स्किनको रोगबाट ठूलो संख्यामा पशु मरेकाले किसानलाई राहत दिने निर्णय नगरपालिकाले गरेको बनेपा नगरपालिकाका प्रमुख शान्ति रत्न शाक्यले जानकारी दिए । उनका अनुसार हालसम्म नगर क्षेत्रमा ५ सय ४३ वटा पशु लम्पी स्किन रोगबाट मरिसकेका छन् ।

यसको रोकथामका लागि खोप अभियान तथा सचेतनामूलक कार्यक्रमहरु सञ्चालन भइरहेको नगर प्रमुख शाक्यले बताए ।

लम्पी स्किन रोगबाट हालसम्म काभ्रेमा १३ सय पशु मरेको भेटेरिनरी अस्पताल तथा पशु विकास केन्द्र काभ्रेका निमित्त प्रमुख डा. श्रीजा वाग्लेले जानकारी दिइन् । उनका अनुसार हालसम्म काभ्रेमा २२ हजार पशु लम्पी स्किन रोगबाट संक्रमित भएको र करिब ५७ हजारलाई रोगविरुद्धको खोप लगाइएको छ ।