थाहानगरमा मेयर वडास्तरीय तरकारी पकेट प्याकेजले किसानमा ल्याएको उत्साह

मकवानपुर थाहा नगरपालिकाले चालु आर्थिक वर्ष २०८०/०८१ मा कृषि क्षेत्रमा नयाँ कार्यक्रम ल्यायो । कृषकहरुलाई यान्त्रिकरणतर्फ उन्मुख गराउन पालिकाले ल्याएको कार्यक्रम हो–‘मेयर वडास्तरीय तरकारी पकेट प्याकेज कार्यक्रम’ । यहि कार्यक्रम अन्तर्गत पालिकाको २ नम्बर वडामा किसानहरुलाई कृषि सामाग्री वितरण गरिएको छ । थाहा नगरपालिकाले १ भाद्रमा सूचना प्रकाशित गरी मेयर वडास्तरीय तरकारी पकेट प्याकेज कार्यक्रम सञ्चालनका लागि निवेदन आव्हान गरेको थियो ।

नगरपालिकाले आव्हान गरेको सूचनाका आधारमा मापदण्ड पुगी छनोट भएको श्री जनता कृषक समूह, थाहा–२ अन्तर्गतका किसानहरुलाई ५ माघमा ७ एच.पि. क्षमताको पेट्रोल प्रयोग हुने २२ वटा मिनिटिलर, र एउटा पानी तान्ने पम्प वितरण गरिएको कृषि शाखा प्रमुख संजय तिवारीले जानकारी दिए । अघिल्लो आर्थिक वर्षको पकेट कार्यक्रम निरन्तरता स्वरुप ५० प्रतिशत अनुदानमा कार्यक्रम सञ्चालन गरिएको शाखा प्रमुख तिवारीले जानकारी दिए ।

कार्यक्रमको अवसरमा थाहा नगरपालिका वडा नम्बर २ ले किसानहरुका लागि ५० वटा स्प्रे पम्प वितरण गरेको छ । तरकारी पकेट कार्यक्रम संचालन निर्देशिका अनुसार सञ्चालन भएकोे मेयर वडास्तरीय तरकारी पकेट प्याकेज कार्यक्रमबाट नगरको कम्तीमा १४० रोपनी क्षेत्रफलका दरले तीन स्थानमा कार्यक्रम सञ्चालन गर्ने पालिकाको योजना छ । किसानहरुले कृषि उपकरण पाएपछि नगरपालिकाप्रति आभार व्यक्त गरेका छन् । दैनिक जीवनशैली नै कृषिमा आधारित भएपश्चात् प्राप्त उपकरणले कृषि कर्ममा लाग्न थप उत्साह थपिएको प्रतिक्रिया दिए ।

थाहा नगरपालिकाका प्रमुख विष्णु बहादुर बिष्टले नगरलाई तरकारीको पकेट क्षेत्रका रुपमा विकास गर्न पाउनु नगरको लागि ठूलो अवसर भएको उल्लेख गरे । ‘हाम्रो नगर कृषि र पर्यटनमा आधारित नगर हो’, प्रमुख विष्टले भने “किसानको हितका निम्ति हुने कामलाई नगरपालिका एकचित्त भएर सहयोग गर्न तयार छ ।’ कार्यक्रममा थाहा नगरपालिकाका उपप्रमुख भरत गोपाली, प्रमुख प्रशासकीय अधिकृत कृष्ण गिरी, २ नम्बर वडा अध्यक्ष बम बहादुर सिन्तान, कृषि विकास अधिकृत विकास विक, कृषि प्राविधिक राजकुमार श्रेष्ठ, वडा कृषि प्राविधिक विनिता विष्ट, वडा जनप्रतिनिधिहरु तथा किसानहरुको उपस्थिति रहेको थियो।