कृषि विकास बैंक बागमती प्रदेश कार्यालय बिरेन्द्रनगर चितवनको सहयोगमा मकवानपुरगढी गाउँपालिका मकवानपुरमा डिजिटल कृषि सूचना परामर्श सेवा केन्द्र स्थापना भएको छ । बैकका निर्देशक रघुनाथ न्यौपानेले डिजिटल कृषि सूचना परामर्श सेवा केन्द्र स्थापनाका लागि एक समारोहकाबीच केयोस मेशिन गाउँपालिकाका अध्यक्ष दोर्जे लामा स्याङ्तानलाई हस्तान्तरण गरे ।
सेवा केन्द्र स्थापनासँगै एक वर्षसम्म प्राविधिक सहजीकरणका लागि जियो कृषि र मकवानपुरगढी गाउँपालिकासँग सम्झौता भएको छ । २० साउनमै भएको कार्यक्रममा पालिकाका प्रमुख प्रशासकीय अधिकृत रामकुमार पुडासैनी र जियो कृषिका प्रतिनिधि सन्दिप देवकोटाले सम्झौता पत्र आदान प्रादान गरेका छन् । डिजिटल कृषि सूचना परामर्श सेवा केन्द्रको फोकल पर्सनको पालिकाका कृषि शाखा प्रमुख चन्द्रकान्त चौधरीलाई तोकिएको छ ।
सेवा केन्द्रले विशेषतः युवा कृषकहरु माझ कृषि सम्बन्धीका प्राविधिक परामर्श सेवा र सूचना प्रवाहमा महत्वपूर्ण भूमिका निर्वाह गर्ने विश्वास लिईएको कृषि शाखा प्रमुख चन्द्रकान्त चौधरीले जानकारी दिए । उक्त प्रविधिमा यसमा कृषकहरुले आफ्नो खेतिपाती तथा पशुपालन सम्बन्धिको विवरण राखेपछि गाउँपालिकामा त्यसको विवरण डिजिटल माध्यमबाट हेर्न सकिनेछ । कृषकहरुको खेतबारी एवम् पशुपालनमा देखिएका समस्याहरु फोटो अथवा आवाज रेकर्ड गरेर पठाएपछि विज्ञबाट आवश्यक सल्लाह सुझाव म्यासेजको रुपमा कृषकहरुले प्राप्त गर्न सकिने सो प्रविधिमा व्यवस्था छ ।
सेवाकेन्द्र मार्फत अब मकवानपुरगढीका किसानले कृषकहरुले खेती प्रविधि, पशुपालन, रोगकिरा व्यवस्थापन, मलखाद प्रयोग तथा मौसम सम्बन्धीको जानकारी घरमै बसी मोवाइल प्रयोग गरेर हेर्न सक्नेछन् ।
कार्यक्रममा कृषि विकास बैंक बागमती प्रदेश कार्यालयका वरिष्ठ शाखा प्रबन्धक नुर प्रसाद गौतम, कान्तिराजपथ शाखाका प्रबन्धक ध्रुुब प्रसाद पौडल, भ्यालुचेन सहजकर्ता ईश्वरराज पन्त, वडा नम्बर ५ का वडाध्यक्ष एवम् प्रवक्ता दिपेश दाहाल, मनकामना दुग्ध सहकारीका अध्यक्ष अर्जुन प्रसाद दाहाल गाउँपालिका विभिन्न शाखाका शाखा प्रमुखहरु र अगुवा कृषकहरुको उपस्थिति रहेको थियो ।
प्रतिक्रिया दिनुहोस्