थाहानगरका विर्खे अञ्जानलाई विशिष्ट युवा प्रतिभा सम्मान

मकवानपुर जिल्लाको थाहा नगरपालिकामा बसेर निरन्तर साहित्य साधनामा क्रियाशील स्रष्टा लक्ष्मण बर्तौला ‘बिर्खे अञ्जान’लाई हेटौंडामा आयोजित एक समारोहबीच विशिष्ट युवा प्रतिभा सम्मान २०८० समर्पित गरिएको छ । हेटौंडामा ११ र १२ असारमा संचालित बागमती प्रदेश युवा सम्मेलनमा बिर्खे अञ्जानलाई सो सम्मान गरिएको हो ।

बागमती प्रदेशका १३ जिल्लाका १५० जना युवाहरूको उपस्थितिमा श्रम, सीप र व्यवसायलगायत सूचना र सञ्चारको सन्दर्भमा छलफल भइ युवा परिषद्का उपाध्यक्ष सन्तोष चौलागाईंबाट ११ बुँदे हेटौंडा घोषणापत्र जारी गरिएको थियो । सो कार्यक्रममा थाहाका साहित्यकार बिर्खे अञ्जानलाई नगद २५ हजार रुपियाँसहित प्रमुख अतिथि बागमती प्रदेशका मुख्य मन्त्री शालिकराम जमरकट्टेलले सम्मानित गरेका हुन् ।

अञ्जानका एकल ४ वटा पुस्तक र सहलेखनका ३ वटा पुस्तक सहित ७ वटा कृति प्रकाशित छन् । बागमती प्रदेशको आर्थिक बर्ष २०७९ ÷०८० को वार्षिक कार्यक्रम अनुसार प्रतिस्पर्धा मार्फत उनी छनोट भएका हुन् । राष्ट्रिय तथा अन्तर्राष्ट्रिय क्षेत्रमा परिचित बिर्खे अञ्जान मूलतः कवि हुन् । यसका अतिरिक्त समालोचना र कथा पनि उनबाट लेखिदै आएको छ ।