मकवानपुर थाहानगरको ३ नम्बर वडाको घट्टेचौरमा वर्षेनी मनाइने हिलेजात्रा आज १६ भदौमा मनाइएको छ । नेवारी समुदायले विशेष महत्वका साथ मनाउने यस पर्व जनकल्याण माविको आँगनमा विभिन्न देवता तथा लाखे नाच र परम्परागत प्रहशनहरु गरेर मनाइएको हो ।
हिलेजात्रामा खेतीपाती, देव–दैत्यबीचको द्वन्द्वसँग जोडिएको परम्परागत नृत्य, लाखे नाच, रोपाइँ अभिनय र प्रहसन समेत गरिएको छ । थाहा नगरपालिका वडा नम्बर २ को पालुङको नेवार वस्ती, देउला वस्ती, थाहा–३ को गोपाली बस्ती, थाहा–१ ओखरबजार लगायतका स्थानबाट जात्रा निकालेर घट्टेचौरमा देखाउने चलन रहेको छ । यस अवसरमा पालुङको पाण्डुकेश्वरबाट महादेवको मुकुट दिउँसो घट्टेचौर ल्याउने र पुजा आरधना गर्ने वर्तालुहरु त्रिवेणीमा स्नान गरी पुजाआज गर्ने चलन रहेको छ ।
घट्टेचौरमा पालुङ र गोपाली गाउँको लाखे नाचसहित रोपाइ नाच, ओखरबजारको रोपाइ नाच, राजारानी नाचहरु प्रदर्शन गरिएको थियो भने पालुङको इन्द्रायणी, गणेश, कालाभैरव, कुमारी र बज्रवाराहीको नाच पनि देखाइएको छ । राजा गुणकामदेवको पालादेखि शुरु भएको यो जात्रा सामाजिक अध्ययनका विद्यार्थीहरुको लागि एक अवसरको रुपमा रही आएको छ । पहिले जात्रामा पसलहरु राख्ने गरेको भए पनि अहिले बढ्दो शहरीकरण र खुल्ला बजारको कारण यो प्रचलन कम हुँदै गएको छ ।
पालिका प्रेस
थप जानकारी
प्रतिक्रिया दिनुहोस्