थाहामा कार्यपालिका चुनावमा तोडियो गठबन्धन, काँग्रेसको उमेद्वारी नै परेन

मकवानपुर थाहा नगरपालिकामा स्थानीय तह सदस्य निर्वाचन २०७९ अन्तर्गत कार्यपालिका सदस्यका लागि हुने निर्वाचनका लागि नेपाली काग्रेसको उमेद्वारी नपरेको स्थानीय तह सदस्य निर्वाचन अधिकृतको कार्यालय थाहा नगरपालिकाले जनाएको छ ।

यसअघि निर्वाचित सदस्यहरु मध्ये महिला ५ र दलित वा अल्पसंख्यकबाट ३ गरि ८ सदस्यकालागि ७ जेठमा भएको मनोनयन दर्तामा नेपाली काग्रेसले कुनै पनि पदमा उमेदवारी नदिएको निर्वाचन अधिकृत तिर्थराज भट्टराइले जानकारी दिए । निर्वाचन कार्यालयका अनुसार ८ पदमध्ये नेकपा एमालेले महिला सदस्यमा ५ र दलित वा अल्पसंख्यकमा कोटामा १ गरि ६ जनाकाृ उमेद्वारी दर्ता गराएको छ । त्यस्तै, नेकपा माओवादी केन्द्रले महिला सदस्यमा ५ र दलित वा अल्पसंख्यकमा २ गरि ७ र नेकपा एकीकृत समाजवादीले दलित वा अल्पसंख्यकमा १ उमेदवारी दर्ता गराएको जनाइएको छ ।

नेकपा एमालेले दलित/अल्पसंख्यकमा अशोक खाती चनारा, महिला सदस्यहरुमा बिमला पाख्रीन, शर्मिला बस्नेत, सानुमैया विश्वकर्मा, उर्मिला कामी र कान्छीमाया वाइवाको उमेदवारी दर्ता गराएको छ ।

यसैगरी नेकपा माओवादी केन्द्रले दलित वा अल्पसंख्यकमा राम दर्जी, रामप्रसाद विश्वकर्मा तथा महिला सदस्यहरुमा रितु कार्की, अञ्जु श्रेष्ठ, पवित्रा कार्की (ठकुरी), अनिता बल र चन्द्रमाया थिङको उमेदवारी दर्ता गराएको छ । एकीकृत समाजवादीबाट दलित वा अल्पसंख्यक कोटामा जनकबहादुर कामीको उमेदवारी दर्ता गराएको छ ।

निर्वाचन कार्यतालिका अनुसार आगामी जेठ १० गते निर्वाचन हुनेछ । माओवादी केन्द्र एक्लैको बहुमत पुग्ने भएपछी गठबन्धन दलहरुलाई भाग लगाउन माओवादी असहमत भएको बताइएको छ तर, नेकपा एकीकृत समाजवादीलाई भने एक सिट दिने सहमती भएको बताइएको छ । कार्यपालिका सदस्यका लागि एमाले एक्लै निर्वाचनमा जाने नगर सह–इन्चार्ज सुरेन्द्रमान प्रधानले बताए ।

हाल थाहानगरमा नेकपा माओवादी केन्द्रको ३२, नेकपा एमालेको १८ र नेपाली काग्रेस १२ जना नगर सभा सदस्य छन् ।