कक्षा १२ उत्तीर्ण गरेका विद्यार्थीहरुलाई पालुङ बहुमुखी क्याम्पसमा अध्ययन गर्न आग्रह गरिएको छ । क्याम्पसले सम्बन्धित विद्यालयहरुमा पुगी अभिमुखीकरण कार्यक्रम मार्फत विद्यार्थीहरुलाई पालुङ बहुमुखी क्याम्पसको विशेषताका विषयमा स्पष्ट पारेको हो । ६ भाद्रमा बज्रबाराही माविबाट कक्षा १२ उत्तीर्ण विधार्थी, अभिभावक र हाल कक्षा १२ मा अध्ययनरत विद्यार्थीहरुलाई पालुङ क्याम्पसमा पढ्न आग्रह गरिएको हो ।

क्याम्पस सञ्चालक समितिका उपाध्यक्ष सुरेन्द्रमान प्रधानको सभाध्यक्षतामा भएको कार्यक्रममा प्रमुख अतिथि तथा ६ नम्बर वडाध्यक्ष राजनभक्त श्रेष्ठले थाहाको उन्नतिका लागि पनि गाउँकै क्याम्पस रोज्न आवश्यक रहेको बताए । कार्यक्रममा बज्रबाराही मावि व्यवस्थापन समिति अध्यक्ष कल्पना बलामीले पनि पढ्दै रोजगारी गर्दैको अवसर रहने हुँदा पालुङ क्याम्पस रोज्न आग्रह गरिन् ।

कार्यक्रमको अवसरमा उत्तीर्ण विद्यार्थीहरुलाई सम्मान गर्दै विद्यालयका प्रधानाध्यापक रमेशमान डंगोेलले पनि गाउँकै क्याम्पसमा पढ्न जरुरी रहेको उल्लेख गरे । कार्यक्रममा क्याम्पसका सहायक प्रमुख गोपाल उप्रेती, प्राध्यापक प्रकाश पौडेलले सहजीकरण गरेका थिए । क्याम्पसका स्वबियु सभापति पुष्कल श्रेष्ठले क्याम्पसमा रहेको सुविधाका बिषयमा जानकारी गराएका थिए ।

कार्यक्रममा क्याम्पस सञ्चालक समितिका कोषाध्यक्ष विमलकुमार ढकाल, सदस्य सहदेव ढकाल, सल्लाहकार प्रमोद जोशीलगायतको उपस्थिति थियो । क्याम्पसमा मानविकी र व्यवस्थापन संकायमा अध्यापन हुँदै आएको छ ।

पालिका प्रेस
थप जानकारी