इन्द्रसरोवरका किसानले उत्पादन गरेको पिडालुको बाग बढ्दो

मकवानपुरको ईन्द्रसरोवरकी बुद्धिमाया थिङले यसपालि करिब दुई रोपनी क्षेत्रफलमा पिँडालु लगाइएकी छिन् । उनकाअनुसार पिँडालु खेतीमा मेहनत कम पर्नुका साथै सिँचाइको आवश्यकता पनि नपर्ने भएकाले किसान यो खेतीतर्फ आकर्षित भएका हुन् । प्रतिरोपनी एक हजारदेखि १२ सय किलोसम्म पिँडालु उत्पादन हुने गरेको स्थानीय किसानले बताएका छन् । गतवर्ष बुद्धिमायाँले करिब ५० हजार रुपैयाँको पिँडालु बिक्री गरेकी थिइन् ।

पिडालुको बजारमा माग धेरै हुने भएकाले बिक्रीमा कुनै नभएको किसानहरु बताउँछन् । किसानले पछिल्ला वर्ष पिँडालुबाट राम्रो आम्दानी लिन थालेका छन् । हरिबोधिनी एकादशी अर्थात् ठूलो एकादशीका समयमा पिँडालुको माग बढ्ने भएकाले यहाँका किसानले मकैभित्रै पिँडालु लगाउने गरेका छन् । मकैसँगै लगाउँदा खानका लागि मकै र आम्दानीका लागि पिँडालु दुवै उत्पादन हुने भएकाले किसान यसतर्फ आकर्षित भएका हुन् । व्यावसायिकरुपमा पिँडालुखेती नगरे पनि मकैसँगै लगाइएका पिँडालुबाटै एकैपटक ४० देखि ५० हजार रुपैयाँसम्म आम्दानी हुने गरेको किसानको भनाइ छ ।

पहिले मकैमात्र हुने यो क्षेत्रमा सडक विस्तारसँगै पछिल्ला वर्षमा तरकारी र नगदे बालीतर्फ किसानको आकर्षण बढेको छ । यहाँ उत्पादन हुने पिँडालु काठमाडौंको कालिमाटी बजारसम्म पुग्ने गरेको छ । हाल किसानको बारीबाटै प्रतिकिलो ८० रुपैयाँमा पिँडालु बिक्री भइरहेको छ । पिँडालुको गानो, सेलो उसिनेर खाने गरिन्छ । कर्कलोबाट मस्यौरा बनाउने र गाभा (पात) समेत विभिन्न परिकार बनाउन प्रयोग गरि न्छ । ठूलो एकादशीका अवसरमा पिँडालु र सक्खरखण्डको माग विशेषरुपमा बढ्ने गरेको छ । एकादशी फलाहार गर्ने परम्परागत चलन भएका कारण ठूलो एकादशी र माघे संक्रान्तिमा पिंडालु, सख्खर खण्ड, तरुललगायत कन्दमूलको ब्यापार बढ्ने गरेको छ ।