ठेक्का लिएर काम अलपत्र पार्ने निर्माण कम्पनीको एक्स्काभेटर र ट्याक्टर दिक्तेल रुपाकोट मझुवागढी नगरपालिकाले नियन्त्रणमा लिएको छ । दिक्तेल हाटडाँडादखि लफ्याङ काफ्लेगाउँ घुम्तीबर सडक स्तरोन्नतिको ठेक्का लिएर अलपत्र पार्ने लगलगे कन्ट्रक्सनको एक्स्काभेटर र ट्याक्टर मंगलबार नियन्त्रणमा लिइएको हो ।
करिब ४६ लाख रुपैयाँको लागतमा असार मसान्तसम्म सक्ने गरी सघन सहरी विकास तथा भवन निर्माण आयोजना ओखलढुङ्गासंग २०७८ माघ २० गते सम्झौता गरेको थियो । उक्त म्याद समेत गुजारेपछि फेरि पुससम्मका लागि म्याद थपिएको छ ।
दिक्तेल रुपाकोट मझुवागढी नगरपालिका क्षेत्रभित्रका विभिन्न योजनाहरुको ठेक्का लिएर अलपत्र पारिएकाको भन्दै त्यसमा संलग्नलाई कारबाहीको माग गर्दै स्थानीयहरूले पनि नगरपालिकासँग आक्रोश पोख्दै आएका छन् । स्थानीयले योजना अलपत्र पार्नेलाई तत्काल काम गराउन र नगरे नगर प्रमुख तीर्थराज भट्टराई, उपप्रमुख विसन राईलाई नै थुन्ने चेतावनी समेत दिएका छन् । ‘हामीलाई हेपिएको हो, जोसुकै होस् हामी छाड्दैनौं,’ स्थानीय दुर्गाप्रसाद घिमिरेले आक्रोश पोखे, ‘ठेक्का लिएर अलपत्र पार्नेहरूलाई कुनै पनि हालतमा छाड्नेवाला छैनौं ।’
प्रतिक्रिया दिनुहोस्